الجامعة تطلب حماية الأسود قبل موقعة تنزانيا
الجامعة تطلب حماية الأسود قبل موقعة تنزانيا
الجامعة الملكية المغربية لكرة القدم ما بقاتش ساكتة هاد المرة دخلت مباشرة بطلب رسمي لحماية بعثة المنتخب الوطني قبل وأثناء المباراة الحاسمة ضد تنزانيا المقررة يوم الجمعة بملعب بنجامين مكابا في دار السلام خطوة كتقول بوضوح إن الأسود ما غاديش يدخلو لملعب فيه شبهة فوضى أو ألاعيب خارج المستطيل الأخضر.
هاد التحرك ما جا من فراغ التجارب السابقة في هاد الملعب كتخلي أي واحد يشك مثلا الرش بمواد غازية فغرف تبديل الملابس أو حتى الشباك أمور كتخلي اللعب الشريف مجرد شعار بلا مضمون وهادشي اللي خلا الجامعة ترفع الصوت وتطلب الضمانات الأمنية قبل صافرة البداية.
الذاكرة القريبة ما زالت محتفظة بصور معاناة الفرق المغربية في تنزانيا نهضة بركان مثلا تقهر بانتظار مرير لأكثر من سبع ساعات كاملة بمطار زنجبار قبل ما يواجه سيمبا في نهائي قاري الواقعة اللي دارت ضجة كبيرة وفضحات أساليب الضغط غير الرياضية اللي كتستعمل لتكسير معنويات الخصم.
اليوم الرهان أكبر لأن المنتخب الوطني ماشي مجرد فريق عادي بل هو صورة بلد كامل والجامعة عارفة أن أي عرقلة ولو صغيرة ممكن تقلب موازين مباراة مصيرية من هاد المنطلق كان التحرك الاستباقي باش اللاعبين يركزو فقط على الكرة وماشي على حسابات غرف الملابس أو عراقيل المطارات.
إلى حدود الساعة الكل كينتظر رد رسمي من الاتحاد التنزاني ومن الكاف اللي خاصها تتحمل مسؤوليتها كاملة في ضمان مباراة نظيفة لأن كرة القدم بلا عدالة ولا تكافؤ ما عندها حتى معنى المشجع المغربي ماشي غادي يقبل يشوف منتخب بلاده ضحية مؤامرات صغيرة خارج المستطيل الأخضر.
